Kini jaman lah canggih. Surek manyurek mulai ditinggakan. Malamar karajo pun baitu. Karanonyo awak dak buliah gaptek, harus mengikuti perkembangan. Jan jadi urang kudet (kurang update) istilahnyo. Kok sanak alun pandai, barajalah dari kini.

Caro mandaftar karajo online ko tabagi duo; lewat situs atau lewat email. Lewat situs maksudnyo malamar lewat situs-situs aplikasi lamaran online macam Jobstreet atau JobsDB? Lai tantu? Kok indak yo lah kudet bana. Lewat email maksudnyo lamaran wak dikirim sacaro digital lewat email. Lai pandai mangirim email? Indak? Yo parah... pesbuk lai, email dak tantu.

Partamo: Lewat Situs

Dunsanak partamo-tamo harus mendaftar (Sign Up) dulu di situs yang dimakasuik, contoh; Jobstreet. Di situs tu isikan data-data sanak di form nan alah disadiokan. Kalau alah sadonyo (tamasuak upload foto jo CV) sanak tingga cari lowongan nan ado di dalamnyo. Mancari bisa berdasarkan wilayah atau keahlian dan sebagainyo. Kok ado nan suai sanak tingga klik apply, ingek: "a.p.p.l.y", bahaso inggirih yo!

Keduo: Lewat email

Partamo-tamo siapkan berkas lamaran: CV, surek lamaran, scan ijazah, scan KTP, scan sertifikat, softcopy foto formal. Nan kaduo siapkan email. Namo email jan alay pulo. Misalnyo aqucantique@gmail.com. Kalau mode tu sanak buek, dibaconyo indak diblokirnyo iyo. Buek sajo pakai namo asli. Pas mangirim caliak bana alamaik email tujuan, jan sampai salah. Tingga se ciek huruf, ndak sampai email sanak.

Kini itu sajo pasan admin. Nanti admin akan sampaikan pasan-pasan barikuiknyo nan mudah-mudahan paguno untuak dunsanak sekalian, khususnyo pengangguran se alam raya. Hihiihiiii...

Wassalam